Fræði, framkvæmd og ferðaþjónusta
Ferðamál á Íslandi kom fyrst út árið 2013 og var þá fyrsta rit sinnar tegundar á íslensku. Þetta er endurskoðuð og uppfærð útgáfa og sem fyrr er tekið á ferðamálum í víðu samhengi. Bókinni er skipt í þrjá meginhluta sem hver um sig endurspeglar einstök áhersluatriði sjálfbærrar þróunar; efnahag, umhverfi og samfélag. Í I. hluta er farið yfir ferðamál í tengslum við hagkerfi, skipulag og stjórnsýslu. Í II. hlutanum er ferðamálum og málefnum umhverfisins gerð skil og í III. hluta er fjallað um ferðamálin, samfélag og menningu og hvernig íslensk samtímamenning tvinnast saman við ferðamál.
Ferðamál á Íslandi er ætluð þeim sem hyggja á nám í ferðamálafræði á háskólastigi og eru að mennta sig í ólíkum greinum ferðaþjónustu á ýmsum skólastigum en jafnframt þeim sem hafa atvinnu af ferðaþjónustu og vilja sjá störf sín og daglegar athafnir í stærra samhengi.
Höfundarnir, Edward Hákon Huijbens, prófessor í landfræði við Wageningen-háskóla í Hollandi, Gunnar Þór Jóhannesson, prófessor í ferðamálafræði við Háskóla Íslands og Magnús Haukur Ásgeirsson, aðjúnkt í ferðamálafræði við Háskóla Íslands, hafa allir sinnt rannsóknum á ferðamálum um árabil.