Sagnabálkurinn Síðustu dagar Skálholts spannar aldarlanga sögu Skálholtssveita. Við sögu kemur fjölskrúðugt persónusafn, allt frá biskupum til soðbúrskerlinga. Einna fyrirferðarmest verður þó skringimennið síra Þórður í Reykjadal sem á sér þann draum að sjá Skálholtsstað brenna einu sinni enn en hefur ekki uppburði til að kveikja þá elda. Frumgerð sögunnar kom út í þremur bókum, Í skugga drottins, Í Gullhreppum og Síðustu dagar Skálholts, á árabilinu 2017–2020.