Bók þessi er helguð fáguðu handverki og listsköpun Aðalbjargar Jónsdóttur, sem er samofin lífshlaupi hennar og minningum.

Jafnframt er bókin innlegg til tóvinnusögu okkar. Aðalbjörg Jónsdóttir sýndi með afgerandi hætti hverju hugur og hönd fá áorkað þegar hæfileikarnir fá að njóta sín. Hún beinlínis prjónaði af fingrum fram undurfína samkvæmiskjóla, útprjónaða í fjölbreyttum mynstrum og formum, og brá ljósi á eiginleika og sérstöðu íslensku ullarinnar.

En þrátt fyrir glæsilegt framlag Aðalbjargar til listsköpunar og merkan þátt hennar í menningarsögu og reynsluheimi kvenna og atburðasögu þjóðarinnar hefur hún tilheyrt hinum þögla hópi kvenna þegar fjallað er um afrek á opinberum vettvangi.

Kristín Schmidhauser Jónsdóttir lauk handavinnukennaraprófi frá Kennaraskóla Íslands 1959 og MA-námi í sagnfræði frá Háskóla Íslands 2014. Einnig nam hún skapandi textíliðju við Kunstgewerbeschule í Zürich og var þar í hópi starfandi textíllistakvenna. Hún hefur stundað kennslu á öllum skólastigum og haldið einkasýningar, auk þátttöku í samsýningum hér á landi og erlendis. Eftir hana hefur birst fjöldi greina um handverk og hún sendi árið 1981 frá sér bókina Tvíbandaðir vettlingar.