Emma og Andrew eru rúmlega miðaldra og eiga tvær dætur sem eru sitt hvoru megin við þrítugt. Olivia, eldri dóttirin, er læknir og hefur verið í Afríku að sinna sjúklingum með bráðsmitandi sjúkdóm. Phoebe er sjónvarps- og samfélagsmiðlastjarna sem hefur helstan áhuga á að skipuleggja væntanlegt brúðkaup sitt.

Eftir heimkomuna þarf Olivia að vera í einangrun í sjö daga og fjölskyldan ákveður að eyða jólahátíðinni saman í sóttkví á sveitasetri. Er hægt að gera sér í hugarlund sjö daga sóttkví með fjölskyldunni …

Öll eiga þau sér leyndarmál sem leysast úr læðingi eitt af öðru í sjö daga samveru. Þessi fyrsta skáldsaga höfundar er gamansöm, átakanleg og sérlega lipurlega skrifuð.